SVEMIRSKI DNEVNIK: PERICA JOKIĆ

KAKO JE KOLE PRESTAO DA PUŠI 

Kole, iz milošte zvani Koka Kole, znao je svakome da kontrira. Nema te priče koju on nije u stanju da izokrene. Niti pravila koje ne može da pobije. Ništa nije kako drugi misli. Njegova je uvijek zadnja. I uvijek protivna.

On bi i krivu Drinu očas ispravio, samo da se slagao sa činjenicom da je ova kriva. Ma šta, nije uopšte dao ni da Drina postoji. Ako i postoji, onda se ona, siguran je bio, drugačije zove.

Pušio je „moravu“ samo da bi pažnju usmjerio na drugu rijeku. Na onu koja, izvjesno, teče. Ili je tekla dotle dok je uvidio da se i drugi slažu s tim.

Istog trena se bacio na opovrgavanje novonastale istine.

Čak je i svoju „moravu“ bacio! Čvrsto riješen da je ponovo zapali samo onda kada ova prestane da se proizvodi.

JAGOŠEVE ZMIJE 

Jagoš je cio život bio vezan za zmije. Najprije kao njihov dreser u cirkusu, zatim kao odgajivač u zoološkom vrtu, itd. Znao ih je u dušu i nikakvih problema sa njima nije imao.

A onda, kada je došlo vrijeme, dvije su se naročito izdvojile i došle mu glave. Iako opasne i česte vrste, zanimljivo je kako ove dvije zmije nijesu našle svoje mjesto niti u jednoj enciklopediji gmizavaca.

I taman kada je namjeravao da ih detaljno prouči, već su ga smotale i izdahnuo je. I ko zna još koliko će proći vremena do naučnog utemeljenja ove dvije vrste tako bezazlenih naziva: tašta i žena.